ادخل وقولي رأيك

تتجوزيني ؟ -


ـ أفندم ؟
ـ بقولك تتجوزيني ؟
ـ ؟؟؟
ـ تتجوزيني ؟
ـ لأ
ـ ليه ؟
ـ بصراحة كدة شكلك مش عاجبني
ـ إزاي يعني ؟
ـ يعني .. أصل أنا ليا مواصفات معينة لفارس أحلامي
ـ مواصفات معينة ؟ .. هو انتي هتتجوزي عربية؟
ـ لأ ! .. بصراحة كده .. إنت مش فارس أحلامي اللي باتمناه



**************************



ـ تتجوزيني ؟


ـ إيه ده ؟ شكلك اتغير
ـ إيه رأيك ؟
ـ واو .. شعرك بقة ناعم ! .. دي باروكة ؟
ـ أيوة
ـ ودي عدسات خضراء ؟
ـ أيوة
ـ واو ! .. بس بجد .. بقيت وسيم .. واو ! ده انت بقيت شبه نيكولاس كيج
ـ مين عباس كيج ده ؟
ـ عباس ؟!! ياي .. إيه عباس دي ؟ اسمه نيكولاس
ـ مين نيكولاس ده ؟
ـ بقة مالكشي في السيما وجاي تكلمني ؟ .. ياي

**************************



ـ تتجوزيني ؟


ـ انت لسه ليك عين تكلمني ؟
ـ أيوة .. أنا عرفت مين بنكرياس كيج ده
ـ أولاً : اسمه نيكولاس كيج
ـ أيوة أيوة .. كنت هاقول اسمه صح .. بس اختصرته .. ده ممثل
ـ ممثل إيه ؟
ـ ممثل أمريكاوي
ـ أمريكاوي ؟! .. إخّييي ! .. اسمه أميريكان يا بابا .. ما تبقاش دونكي
ـ دونكي دي تبقى شتيمة ؟
ـ أوف كورس



**************************



ـ تتجوزيني ؟


ـ عندك عربية موديل كام ؟
ـ موديل دي تبقى شتيمة ؟



**************************



ـ تتجوزيني ؟


ـ قوللي الأول .. حاطط أنهي نغمة في الموبايل بتاعك ؟
ـ نغمة دي تبقى شتيمة ؟



**************************



ـ تتجوزيني ؟


ـ ما قلتليش .. إنت بتشتغل إيه ؟
ـ أنا -بلا فخر- عاطل
ـ عاطل ؟ .. ياي
ـ مش أحسن من اللي ما بيشتغلش ؟
ـ لا
ـ يعني مش هتتجوزيني ؟
ـ لا
ـ كدة أنا أزعل
ـ ما تزعلش يا بابا .. خليك فريش
ـ ماشي .. ماشي .. بس قوليلي
ـ إيه ؟
ـ فريش دي تبقى شتيمة ؟



**************************



ـ تتجوزيني ؟


ـ لقيت شغل ؟
ـ أيوة طبعًا .. سنتين وأنا بادور .. أخيرًا لقيت
ـ وإيه هو ؟
ـ سواق تاكسي
ـ ياي ! .. مش مكسوف وانت بتقولها ؟
ـ فيها إيه ؟ العمل شرف .. وكلها كام سنة وأجمع مبلغ كويس
ـ شرف ؟ جتك القرف



**************************



ـ تتجوزيني ؟


ـ جمعت مبلغ كويس ؟
ـ طبعًا .. مبلغ كبير جداً
ـ قد إيه يعني ؟
ـ ألف جنيه
ـ نعم ؟!!! .. ألف جنيه دول تروح تسرح بيهم ببطاطا
ـ يعني موافقة ؟
ـ روح اتنيّل



**************************



ـ تتجوزيني ؟


ـ عندك شقة ؟
ـ طبعًا .. أوضة على السطوح
ـ نعم ؟
ـ إيه المشكلة ؟! .. أحسن ما ننام في الشارع
ـ في الشارع ؟! .. إيه الألفاظ السوقية دي ؟ ياي ! .. لازم يا بابا تجيب شقة
ـ طيب .. كلها كام سنة وأجيبلك أحسن شقة في الدنيا
ـ وهتجيبها في جاردن سيتي ولا في الزمالك ؟
ـ لا .. في الأهلي .. هيهع هيهع هيهع



**************************



( بعد سنوات)
:



ـ تتجوزيني ؟


ـ جبت الشقة ؟
ـ أيوة .. الحكومة بتبني شقق للشباب وأنا خدت شقة .. صحيح إنها اتأخرت لسبع سنوات .. لكن المهم إنها جات
ـ فانتاستيك
ـ بس الشقة ناقصة حاجة
ـ إيه هي ؟
ـ مفيهاش حمام
ـ امشي من قدامي ! .. مش طايقاك



**************************



ـ تتجوزيني ؟


ـ إنت تاني ؟
ـ جبتلك حمّام إنما إيه
ـ خليه ينفعك
ـ ليه بس ؟ .. ده ينفع لينا احنا الاتنين
ـ وأنا مالي ؟
ـ مش عاجبك .. مش مشكلة .. أكتبه باسمك




**************************



(بعد سنين)
..



ـ هتتجوزيني ولا أولع فيكي ؟
ـ ومالك محروق كدة ؟
ـ حكايتنا طولت قوي .. طولت أكتر من اللازم
ـ أوكي .. بس ممكن أعرف حاجة ؟
ـ إيه ؟
ـ إنت ليه متمسك بيا أوي كدة ؟
ـ أصل .. أصل
ـ أصل إيه ؟
ـ أصل أنا بحُبك
(بضم الحاء)
ـ بحُبك ؟!! .. إيه بحُبك دي ؟! .. إسمها بحِبك (بكسر الحاء) بعدين خليك روش وقول
I love you
ـ ماشي .. بس قوليلي
ـ نعم ؟
ـ روش دي تبقى شتيمة ؟



**************************



ـ تتجوزيني ؟


ـ بصراحة .. في حاجة كنت عاوزة أقولهالك من زمااااااان
ـ إيه ؟
ـ أنا بصراحة .. مش شايفة إن في حد في العالم يستاهلني
ـ يا سلام ! .. ليه ؟
ـ عشان أنا جميلة .. خفيفة الدم .. رشيقة .. رقيقة
ـ رقيقة ؟! .. ده انت بدأتي تقشفي
ـ فشر
ـ فوقي لنفسك .. العمر بيجري
ـ أنا مصرة على رأيي
ـ يعني إيه ؟
ـ يعني اقطع معايا
ـ بعد كل السنين دي ؟! .. بعد كل الحب ده ؟
بلاش تراجيديا من فضلك -
ـ ماشي .. بس قبل ما أمشي عاوز أسألك سؤال واحد بس
ـ إيه هو ؟
ـ تراجيديا دي تبقى شتيمة ؟



**************************



( بعد سنوات )
..



ـ تتجوشيني ؟
ـ إيه ؟
ـ تتجوشييينييييييي ؟
ـ إنت مين ؟
ـ أنا حبيبك يا هبلة .. البشي النضارة عشان تشوفيني
ـ طيب شاعدني عشان ألاقي النضارة
ـ آهي على الترابيزة قدامك
ـ فين ؟
ـ لا دي نظارتي أنا
ـ أيوة لقيتها
ـ البشيها بقة
ـ ططييبب
ـ عينيكي فوق شوية .. ده بقك
ـ طيب لبشهالي إنت
ـ عقبال ما البشك الدبلة
ـ ما تكشفنيش .. كنت بتقول إيه بقى ؟
ـ كنت بقول تتجوشششيييينيييييي ؟
ـ أكوشك ؟ .. إزاي ؟
ـ يا ولية مش تكوشيني .. تـ .. تـ .. جـ .. و.. شـ .. يـ .. نـ .. ي؟
ـ دي شتيمة ؟
ـ لاااااء .. بقولك تتجوشيني ؟
ـ آه !! .. أجوشك
ـ بالضااااابط .. هاه ؟
ـ شيبني أفكر
ـ أشيبك تفكري ؟! .. ده انت هتموتي خلاش
ـ لا .. شيبني أفكر بش
ـ ربنا يوفقك
ـ إيه ؟
ـ ربنا يوفقك
ـ بتقول إيه ؟
ـ ربنا ياخدك



**************************



(على فراش الموت)
:

ـ تـ … كوح .. كوح .. تتـ .. كوح كاح كيح .. تتكو .. كوح .. كوح تتكوشـ .. كوح كوح .. يني ؟
ـ مش شامعة
ـ بـ .. قوللـ .. كوح .. كوح .. بقولك .. تـ .. تـ .. كوح .. كوح تتجوشيـ .. ؟ كوح .. كوح
ـ أجوش مين ؟
ـ هـ .. و.. ه .. كووح كوح كاح .. هوه إنتي .. كوح كوح .. معرفتيـش .. كوح كوح كيح .. ميـ .. كوح .. مين ؟
ـ إيه ؟
ـ لا .. كوح .. أبدًا .. كوح .. كنت … كح كح .. بأكح
ـ كنت بتكح ؟!!!! .. شلامتك .. ما قلتليش ليه ؟
ـ هو .. كوح .. إنتي .. لشة .. عارفـ .. ـة .. كوح كوح
ـ بتقول إيه ؟
ـ يا .. ولية .. كوح كوح .. ردي .. كوح كوح .. عليا .. تـ .. تـ .. جو شيـ .. كوح كوح كوح كوح .. نـي ؟
ـ أجوشك ؟!! .. طب بش خد الدوا الأول
ـ يا وليـ .. ـة .. كوح .. كوح .. أنا .. كوح .. كوح .. هتتجوشيـ .. كوح
كوح كوح .. ـني ؟
ـ أيوة يا حاج .. موافقة
موافقة إنك تتكوشني ..أخيـ….كوح كوح ..راااااً !! .. كوح كوح كدة أموت .. كوح كوح .. وأنا .. كوح .. مطمئن ومرتاح .. الودااا .. كوح ..ع ع ع ع
ـ يا حاج .. يا حاج
لااااااااااااااااااااااااااااا

سانكس علي مرورك يا هيثم

جميل اوي ايه الفن ده

enty shaklk bta3rafy t2alfy 7lwa moot

ههههههههههههههههههههههه
سندريـــــــــــــــــلا نو كومنت
هههههههههههههههههههههههه
انتي فظيعه والله ملكيش حل بجد

سانكس علي مرورك يا ميدو

منوره طبعا يا دودو

ماشي يا سي اشرف اضحك براحتك بس برضه نورت الموضوع

اية يا سندريلا الجمال دة تجوزينى!!!!!!!!!!!

هههههههههههههههههههههههههههه

ايه يا برنسيس مينفعش خالث

ميرسي يا محمد مرورك نور الموضوع

السلام عليكم ورحمة الله وبركاته
....حلو قوي السيناريو ده ..انا لاحظت فيه انه ناقش كل المشاكل المعوقات التي تواجه كل شاب عندما يفكر في الاستقرار والارتباط ببنت الحلال....
تفتكروا ايه هي الاسباب وراء قضية او مشكلة العنوسة في مصر..؟؟؟؟؟؟؟؟؟
فكروا ...اكيد دي بترجع لاسباب كتيرة قوي ممكن نقول منها مثلا:
- البطالة
- ارتفاع الاسعار في كل حاجة ومنها طبعا " اسعار الشقق - اسعار الذهب - حتي السلع الاستهلاكية ومنها طبعا رغيف العيش وازمته المعروفة ......الخ"
- ومنها اكيد مشاكل اقتصادية مثلا زي انخفاض قيمة الجنيه المصري امام العملات الاجنبية الاخري ...ودي مشكلة جامدة جدا بيواجهها الشاب الي فكر في الهجرة ولما هاجر لسنوات وجمع من المال الي كان يقدر عليه ويرجع عشان يرتبط ببنت الحلال ويستقر يلاقي ان الي جمعه ميجبش حاجة .............يقوم راجع تاني عشان يجمع اكتر ....وهكذا ....الي ان يصل به الحال كما وصل اليه بطل السيناريو السابق الذكر ويروح الي بنت الحلال يقولها ...
تـ … كوح .. كوح .. تتـ .. كوح كاح كيح .. تتكو .. كوح .. كوح تتكوشـ .. كوح كوح .. يني ؟

ولو فكرنا اكتر من كدة هنلاقيها اسباب كتيرة قوي
عايزة اقولكم كمان ان من السيناريو ده نقدر نفهم ان العنوسة دلوقتي مش في البنات وبس لا ...
دي كمان بقيت صفة بتلازم الشباب كمان وفي احصائيات كتير بتجمع نسبة العنوسة في مصر للشاب الاولاد والبنات .....ومنها
اخر
إحصائيات الجهاز المركزي للتعبئة العامة والإحصاء فقد تخطا حوالي ثلاثة ملايين وسبعمائة فتاة سن الزواج وبلغن من العمر خمسة وثلاثين عاما بدون زواج واكثر من خمسة ملايين شاب في نفس المرحلة العمرية ولم يتزوجوا .
ودي كمان احصائية قديمة شوية ...في احصائية جديدة عايزة اقولها للبنات يمكن يقدروا حجم المشكلة الي هم فيها وانا طبعا معهن ..وهي تقول : انا نسبة العنوسة ارتفعت في مصر



في الآونة الأخيرة بشكل خطير حتى وصلت ـ حسب الاحصائيات ـ إلى 10 ملايين عانس



في النهاية عرفنا ايه مشكلة الشباب في عدم الارتباط طيب ايه هي مشكلة البنات ....ياتري ايه هي ..؟؟؟؟

صورة فتي الاحلام ....عايزة اقوللك انه مفيش حقيقة للصورة الي انتي رسمتيها وقاعدة مستنيها مفيش للاسف بلاش تخلي وسائل الاعلام ومنها التليفزيون وتصويرها للخطيب بانه شاب رومانسي وسيم طول النهار قاعد يدلع فيكي ده في الافلام بس مش في الحقيقية ....الواقع غير كدة تماما ...

اوعي تفرضي شروط صعب انك تلاقيها يبقي بتظلمي نفسك مش حد تاني وفجأة هتلاقي نفسك راكبة قطار العنوسة...............



دي كان راي في القضية الي كانت وراء السيناريو السابق .....والذي دفعني الي هذه المشاركة ما هو الا خوفي الشديد علي الشباب الي انا منهم لانهم لو غرقوا هغرق معهم واذا مروا بسلام فايضا انا معهم

اتمني اني كل واحد بعد قراته للمنشاقة الطويلة دي انه يكون فكر صح ...وحدد هدفه
للمزيد
http://www.arabiyat.com/magazine/publish/article_379.shtml
http://www.arabiyat.com/magazine/publish/article_285.shtml
l

سانكس ايميس علي مرورك وردك الرائع اللي زود التوبيك بجد

ميرسي كلبظ علي مرورك نورت الموضوع

مرسي يا جميل

100 100 الموضوع دة
تقبلي مروري

فكره جميله مينك بسراحه
شكرا على الموضوع الجميل اوى ده